‘ሎሚ’ ካብ ፍልስፍና ስቶዋነት ዝተወስዱ 366 ዕለታዊ ኣስተንትኖታት ኣጠቓሊላ ትርከብ። ነዚ ትምህርትታት’ዚ ንምሉእ ዓመት (እንተላይ’ውን ንዝመጽእ ዓመታት) ብምክትታል፡ ሰላማዊ ህይወት ንምንባር ዘድሊ ህድኣት፡ ነብሰ-ንቕሓትን ተጻዋርነትን ከተጥርዩ ኢኹም።

መጋቢት 21

እቲ ዝበለጸ ዕረፍቲ፡ ኣብቲ ዘይኮነስ ኣብዚ እዩ ዘሎ

“ሰባት ናብ በረኻ፡ ገምገም ባሕሪ ወይ ድማ ጎቦታት ብምኻድ ከዕርፉ ይብህጉ እዮም። ንሕና’ውን ብተመሳሳሊ ከም’ዚኦም ንዝኣመሰሉ ነገራት ንምነዮም ኢና። እንተኾነ ግን፡ ነዚ ዕረፍቲ’ዚ ኣብ ዝኾነ እዋን ኣብ ውሽጥና ክንረኽቦ ንኽእል ከለና ኣብ ዝረሓቑ ቦታታት ክንረኽቦ ምፍታንና መርኣያ ናይ ዘይብሱል ኣተሓሳስባ እዩ። እቲ ምንታይሲ፡ ካብ ኣብ ገዛእ መንፈስና ንላዕሊ ሰላማውን ህዱእን ዕረፍቲ ክንረክብ ኣይከኣልን እዩ — እሞ ድማ ኣብ ትሕቲ ልዑል ቍጽጽር ኣእምሮና ብምዝናይ እንተ መሊእናዮ በረኣእያይ ካብዚ ዝበልጽ ምሕደራ የልቦን። ኔርና ኔርና ንነብስና ከምዚ ዝኣመሰለ ዕረፍቲ ከም ህያብ ንሃብን ንተሓደስን።”

— ማርቆስ ኣውረልዮስ

ኣብ ዝመጽእ ቀረባ ግዜ ናይ ዕረፍቲ መደብ ኣሎናዶ፧ ንዝመጽእ ቀዳመ-ሰንበት ሰላማውን ጸጥ ዝበለን እዋን ንምሕላፍ ተሃንጢናዶ ኣለና፧ ምናልባት ብድሕሪ ነገራት ምስካኖም ወይ ድማ ነዚ ሽግር’ዚ ድሕሪ ምስጋረይ ኢልና ንሓስብ ንኸውን ኢና። እንተኾነ ግን፡ ከም’ዚኦም ዝበሉ ድልየታት ክሳብ ክንደይ እዮም ዝዕወቱ፧

መምህር ኣገባብ ኣስተንትኖ ዘን ዝኾነ ጆን ካባት-ዚን በሃሊ’ዚ ህቡብ ዝኾነ ጥቕሲ እዩ፤ “ኣብ ዝኸድናዮ ቦታ፣ ንሕና ድማ ኣብኡ ኣለና።” ናብ ውሽጥና ብምትኳር ኣብ ዝኾነ ይኹን እዋን ዕረፍቲ ክንረክብ ንኽእል ኢና። ኣዒንትና ዓሚትና ኮፍ ብምባል ትንፋስና ንውሽጥን ንደገን ክመላለስ ከሎ ከነስተማቕሮ ንኽእል ኢና። ኣብ ከባቢና ዝርከቡ ተክኖሎጅያዊ መሳርሒታትን ኣብ ርእስና ዝመላለሱ ረበሽቲ ሓሳባትን ከነጥፍእ ንኽእል ኢና። እዚ ድማ ሰላም ክልግሰልና እዩ። ካብዚ ወጻኢ ግና ዝኾነ ይኹን ሓቀኛ ሰላም ዝልግሰልና ኣይክህሉን እዩ።

መጋቢት 22

ምልክት ሓቀኛ ትምህርቲ

“ግቡእ ትምህርቲ ቀሲምና ንበሃል ደኣ’ሞ መኣስ እዩ፧ ግቡእ ትምህርቲ ንቐስም፡ ባህርያውያን ርድኢታትና ብመሰረት ኣቕዋም ባህሪ ኣብ ግብሪ ንኸነውዕልን ካብዚ ሓሊፍና ድማ ኣብ መንጐ’ቶም ኣብ ትሕቲ ቍጽጽርናን ካብ ቍጽጽርና ወጻእን ዘለዉ ነገራት ፈሊና ክንግንዘብን ምእንቲ ክንመሃር ከለና እዩ።”

— ኤጲቅጤጦስ

ኣብ መንደቕ ዝተለጠፈ ዲግሪ ስለ ዘሎና ምሁራት ኢና ኢልካ ምሕሳብ ልክዕ ከምቲ ጫማ ስለ ዘሎና ክንከይድ ንኽእል ኢና ምባል እዩ። መጀመሪ እዩ፣ እንተኾነ ግን፡ ፈጺሙ እኹል ኣይኮነን።

ከምኡ እንተ ዝኸውን ደኣ’ሞ ስለምንታይ እዮም “ምሁራት” ዝበሃሉ ሰባት ርትዓውያን ዘይኮኑ ውሳነታት ዝወስዱ፧ ወይ ድማ ኣዝዮም ርዱኣት ዝኾኑ ነገራት ዝስሕቱ፧ ብኸፊል፡ ሓደ ካብቲ ዝስሕትዎ ኣብ’ቶም ኣብ ትሕቲ ቍጽጽሮም ዝርከቡ ነገራት ጥራይ ከተኩሩ ከም ዝግባእ ስለ ዘይግንዘቡ እዩ። ሓንቲ ክሳዕ ሕጂ ክትሰርር ዝኸኣለት ቍንጫል ጽሕፍቲ ፈላስፋ ሄራቅሊጦስ ነዚ ሓቂ’ዚ እያ እተግህድ፤

“ብዙሓት ዝተማህሩ